Մարտ 30, 2025
ՔԱՀ եկեղեցու զույգերի ծառայությունը երեկ անցկացրեց իր ամսական հավաքը, որին մասնակցեցին 29 զույգեր՝ միասին սովորելու և հաղորդակցվելու նպատակով։ Վեր. Հովհաննես Հովսեփյանը շարունակեց ուսուցանել Գերի Չեփմենի հեղինակած «Ամուսնական կյանքի չորս եղանակները» գրքից՝ կենտրոնանալով «ձմեռ» եղանակի վրա, որը ներկայացնում է ամուսնության մի փուլ, երբ զույգը զգում է սառնություն և հեռավորություն միմյանցից։ Հովիվը ներկայացրեց լուծումներ՝ ինչպես հաղթահարել այս դժվար շրջանը, և կազմակերպվեց քննարկման պահ։
Բացի այս ուսուցման հատվածից, զույգերը ճաշակեցին համեղ իտալական ուտեստներ, խաղացին զվարճալի Աստվածաշնչյան հարցաշար, լրացրին զույգերի հարցաթերթիկ, երգեցին օրհնության երգեր և կիսվեցին աղոթքի խնդրանքներով իրենց ամուսինների հետ։ Զույգերը իսկապես օրհնյալ և հագեցած ժամանակ անց կացրեցին միասին։
Եփեսացիների 4րդ գլխում գրված է` “25Արդ սուտը դեն նետելով՝ թող յուրաքանչյուր ոք ճշմարտությո՛ւնը խոսի իր ընկերոջ հետ (Զաք. 8.16), քանի որ միմյանց անդամներ ենք։ 26Եթե բարկանաք, մի՛ մեղանչեք (Սաղ. 4.4). թող արեգակը ձեր բարկության վրա մայր չմտնի։ 27Եվ սատանային առիթ մի՛ տվեք։ 28Նա, ով գողանում էր, թող այլևս չգողանա, ավելին՝ թող աշխատի՝ իր ձեռքերով բարիք գործելով, որպեսզի կարիքավորին տալու բան ունենա։ 29Ձեր բերանից թող ոչ մի վատ խոսք դուրս չգա, միայն այն, որ բարի է, հավատի շինության համար պիտանի, որպեսզի շնորհ տա լսողներին։ 30Եվ մի՛ տրտմեցրեք Աստծու Սուրբ Հոգուն, որով կնքվեցիք փրկության օրվա համար։ 31Ամեն դառնություն, բարկություն, սրտմտություն, աղաղակ և հայհոյություն թող վերանա ձեզանից ամբողջ չարությամբ հանդերձ։ 32Միմյանց հետ քա՛ղցր եղեք, գթած՝ միմյանց ներելով, ինչպես որ Աստված էլ Քրիստոսի միջոցով ձեզ ներեց։“
